Garderobe 3 = 3 pünkt?

Am samstimorge hei mir üs ufe wäg uf basu gmacht, wo mir am 13:00 ahpfiff gäge die neue ufstigerinne hei gha. Mit dr Nik wo äntlech wider zrügg isch (judihuiii), Meli wo wider gsung isch, aber dr Sarah wo ir Karibik dr Jack Sparrow am sueche isch, simer fasch komplett gsi.

Mir si guet i di erste zwöi sätz gstartet, annahme si 1A gsi und so hets o vore am Netz ab und zue zimlech dätscht. Obwouh dr ds spiufäud nid optimau isch zeichnet gsi (blau uf blau -super) hei mir die erste zwöi sätz beidi mit 25:18 hei tah!

Nach dene sätz het sech dr Löru müesse verabschide zum säuber uf Nidou gah ds spile, und het üs am Noel überlah. Mir si absolut im mood gsi, dä dritt satz iz oh no ds hole und mitemne subere 3:0 wider us dem basu use ds gah. Dem war nicht so, im dritte satz hets bi üs nümme so funktioniert wie i de erste zwöi u d baaaslerinne hei chönne ufdräie im service und im ahgriff. Dä dritt satz hei mr 25:16 müesse abgäh.

Auso, dehaut im vierte Satz! Es isch e guete fight gsi, paar ächt spektakuläri bauwächsle und oh ar stimmig het me gmerkt, dass mir üs die 3 pünkt wei hole. Trotzdem het ds nid glängt und d gägnerinne si mittlerwile richtig in fahrt cho. Leider hei mer o dä satz verlore, 25:22

Chli kränkt aber immer no muetig und lut si mr i füft satz, dä satz het einigermasse usgliche ahgfange, mir hei aus team enang ghufe, stimmig probiert ds machä aber irgendwie isch d luft eifach dusse gsi und mir hei ds ganze nümme chönne dräie, 15:9 verlore.

Die niederlag duet weh, aber iz heissts abhäggle und witermache. mir lehre drus und si iz umso hungriger am mittwuch ire wuche gäge münsige ds punkte!!!

VBC Münchenbuchsee vs. City Volley Basel (25:18/25:18/16:25/22:25/9:25)