Spitzespiel vor Vorrundi wiederholt sich ir Rückrundi

Wie ou scho ir Vorrundi het üsi begegnig mit Burgdorf z Spitzespiel bedütet. Ds Training am Donnsti het o mitm Satz «d usgangslag isch chli e angeri als ursprünglich planet» gstartet. Isch de am Tag selber o nomau chli angersch worde da mit paar ahgschlagnigi Spielerinne hei gha u mir ni gwüsst hei wie mir werde chöne ufstelle.

Vor dem Spiel si mir ei Punkt hinger Burgdorf gsi. Mir hei auso gwüsst, wenn mir das Spiel für üs chöi entscheide, de hei mir e grosse Schritt richtig ufstieg gmacht. Üs isch aber ou bewusst gsi, was fürne Gegner mit Burgdorf uf üs wartet u wege dem isch ds erste Ziel eifach gsi üses Spiel düre z zieh u vor allem Freud z ha a dem wo mir mache.

Mir si guet i erst Satz gstartet u hei dank starche Service u guete Aktione am Netz gd vo afang ah es paar Pünkt chöne i füehrig ga. Bi 16:10 isch de ds Time Out vo Burgdorf cho um üse louf z ungerbreche. Dr erst Punkt nach em Timoe Out isch no üs gsi aber ner hei mir e Serie vo 8 Pünkt dür starchi Service sowie sehr plazierte u starche Ahgriffe vo Burgdorf becho. Mir si sichtlich chli zemebroche u hei immer wie meh Eigefehler gmacht. O e Spielerwechsel het nüm viu chöne ändere. Dä Satz hei mir Schlussendlich mit 25:20 müesse abgäh.

Dr Start i zwöit Satz isch sehr usgliche gsi bis sech de bi 8:8 es paar blödi Eigefehler hei ihgschliche u Burgdorf mit vier Punkt i füehrig isch… Um das möglichst schnell z ungerbreche isch e Spielerwechsel cho. Mit nöiem Wind hei mir de uf 18:18 chöne ufhole u Burgdorf zum Time Out zwinge. Ds Spiel isch sehr usgliche witer gange bis zum Schluss. Nach 34 Minute isch de dä Satz mit 29:27 für üs entschiede gsi.

Im dritte Satz isch dasmau Burgdorf direkt vo afang ah im Vorteil gsi. Bi üs si de Eigefehler wieder chli meh worde u Burgdorf isch wie scho i de zwöi Sätz vorher sehr guet ir Verteidigung gstande u hei vieli Bäll chöne rette. Ds het üs ds Lebe ni viel eifacher gmacht. Mir hei üs aber Mitti Satz nomau guet zrug kämpft u si nomau uf 15:16 here cho. Dert isch erneut es Time-Out vo Burgdorf cho. Si hei ner sehr souverän u varianterich gspielt. Somit si si üs wieder dervo u mir hei o dä Satz müesse ah Burgdorf mit 25:19 abgäh.

Im letste Satz isch de bi üs chli d Luft dusse gsi u Burgdorf het ihres Niveau düre zoge u het guet Verteidigt, Überleit u Druckvoll Ahgriffe u ou dr Block guet gstellt. Dä Satz hei mir de mit 25:14 abgäh.

O we mir somit d rechnig vor Vorrundi ni hei chöne begliche, luege mir ufenes guets Spiel zrug u chöi sege Burgdorf isch ds sterchere Team gsi. Mir chöi aber Stolz uf üsi Leistig und ufe Team zemehalt si. Burgdorf gratuliere mir zum Ufstieg. Da bi üs alles sehr eng isch, heissts nomal alles gäh das dr 3. Schlussrang möglich isch.

Nächst Samsti steit 17.30 Uhr z letste Spiel vor Saison gege VBC Studen in Stude ufem Programm. Mir freue üs uf jedi Ungerstützig!

VBC Burgdorf a – VBC Münchenbuchsee (25:20 / 27:29 / 25:19 / 25:14)