Uf dr Strecki blibe

Nach de letzte zwöi Spiel, wo mir unger angerem die damalige Tabäuefüehrerinne us Gerlafinge mitemne 3:0 vom Platz hei verwiise, heimer am Friti Abe gäge z'Dame 2 vo Uni Bärn wiiteri wichtegi Pünkt für üs wöue hole. Mir si pünktlech ei Stund vorem Spiel ir Muesmatt-Halle ahcho - oh wemer scho paar Mau ih dere Halle gspiut hei, simer jedes mau wieder über die änge Verhältnis, vorauem was d'Hallehöchi betrifft, überrascht. Aber item, das söu üses Spieu nid beiflusse, mir fokusiere üs wieder uf d'Vorbereitig. Nachere churze Ahsprach vor Dinah und vom Domi (merci öich zwöine fürs Coache) ir Garderobe, göhmer motiviert ufs Fäud u nähme z'Ihloufe ih Ahgriff. 

Im erste Satz lege mir los wie d'Führwehr! Mir erspiele üs schnäu es guets Pöusterli vo 6-7 Pünkt dank guete Services, Defense und ou clevere oder herte Ahgriffe - ou dr eint oder ander Fähler vom Gägner het üs ghulfe. Dr ganz Satz über heimer üse Vorsprung plus minus chönne verwalte, ou we Uni dr Abstand het chönne verchürze - zum Schluss heimer dr erst Satz de mitemne 4-Punkte-Vorsprung chönne gwinne. 

Allez, wiiter so, nid nahlah und konsequent blibe, das heimer üs füre 2. Satz vorgnoh. Mir hei das leider nid ganz umgsetzt. Zu vieu Eigefähler, sigs am Service oder im Block und Ahgriff, heimer ou chli meh Müeh ir Anahm gha. Uni het ufdräiht und die eigeti Fählerquote abegsänkt, während mir gad z'Gägeteil hei gmacht. Mir hei versuecht üs wieder is Spiel z'kämpe, aber de leider dä Satz 18:25 verlore. 

Ei Satz isch kei Satz, heimer üs de gseid bim Sitewächsu, äs het no niemer öppis gwunne oder verlore. Dr Start i dritt Satz isch üs de wieder besser glunge und mir hei am Block wieder stabiler gschaffet und ou ir Defense Bäu grettet. Ab Mitti Satz het de plötzlech e Servicespielerin vo Uni eis um z'andere Mau serviert, u das nid z'eifach und z'weni hert. Üse Spielufbou isch erschwärt gsi und dr Abschluss im Ahgriff z'wenig konsequent oder ou intelligänt. Mir si zwar dran blibe, hei aber de dä Satz 22:25 müesse abgäh - dä het chli weh tah, wär doch mit dr einte oder andere Aktion chli meh dinne gläge. 

Göhmer doch über 5 Sätz - aber das war wohl nix. Gad paar Fähler zum Start i viert Satz vo de Ahrifferinne, Blockerinne und leider ou am Service. Mir hei i däm Satz so viu Servicefähler gmacht, dassme äuä scho bau dr ziitwilig 10-Punkte-Rückstand drmit chönnt erkläre (okay, villech nid ganz, aber fasch...). Irgendwie het i däm Satz nüm viu zämepasst und d'Konzentration isch ou im Chäuer gsi - mir hei no chli Kosemtik chönne mache und nid gad mit 10 Punkt Rückstand dr Satz verlore, aber de glich 18:25. 

Mir heinis wichtigi Pünkt lah näh, wo mir im Abstiegskampf bruche - aber nichtsdestotrotz heimer dr Chopf ufe und schaffe wiiterhiin ah üsne Defizit und ou ah üsne Stärkine, damit mir nächst Sunnti gäge VoPap wieder Pünkt chöi hole und es bessers Spiel ufs Fäud lege. 

Eini für Aui - Aui für Eini - TEAM

VBC Uni Bern - VBCM 3:1 (21:25, 25:18, 25:22, 25:18)