Spitzespiel vor Vorrundi

Dä samsti isch es so wit gsi u mir hei üse Tabellenachbar Burgdorf dörfe begrüesse. Mir hei üs auso ufenes spannends und intensivs Spiel gfasst gmacht, schliesslich ischs um d Tabellefüehrig gange.

Im erste Satz si mir sehr guet gstartet u hei gd vo Afang ah es paar schöni Pünkt gmacht. So si mir 9:5 id füehrig. Dadruf het Burgdorf ufdreit und isch uf 8:9 here cho. Damit mr schnell chli hei chöne dure schnufe u üs wieder fah hets ds erste Time Out gäh.

Nachdem isch ds Spiel wieder recht usgliche gsi u Burgdorf het sich erst Mitti Satz nomau mit em ne 3-Punke Vorsprung chöne absetze. Es witers Time Out vo üsere Site het üse de wieder is Spiel bracht u het üsi Gägner de bi 19:19 zum Time Out zwunge.  Trotz allem hei mir ner dr Satz mit 21:25 abgäh.

Chopf la hange nachem erste Satz gits ni. Mir wüsse das mir vieli gueti Aktione hei gha wo mir dran chöi ufboue. Auso si mir voll motiviert i 2. Satz gstartet.

Dr Start hei mir aber de irgendwie chli verschlafe u di gd am afang mit 2:6 ir Rückstand grate. Bi 4:8 hei mir ner e super Serviceserie vor Mia gha u hei Burgdorf starch unger druck chöne setze. Ds het zur Folg gha ds mir wieder voll drbi si gsi mit 10:8. Es isch auso gar nüt verlore i dem Satz. Dr Vorsprung hei mir recht guet chöne halte bis zu 16:20 wo de z zwöite Time out vo Burgdorf isch cho. Si si de dur das o nomau uf 21:20 here cho. Nach em ne witere Time Out vo üs hei mir aber dä Satz de mit 25:22 chöne hei tue.

Dr dritt Satz isch ganz nachem Motto gsi: Ein Satz mit x, das war wohl nix. Hie zue muess me ni viel sege u de isch mit 7:25 ah Burgdorf.

Nach em dritte Satz wo würk eifach zum vergesse isch gsi, hei mir nomau wöue zeige was mir chöi um e füfte Satz z erkämpfe.

Dr Satz het o wie dr erst, sehr usgliche ahgfange u beidi Teams hei schöni Pünkt gha. Mitti Satz het sich Burgdorf dank erneute starke Service e 3-Punkte Vorsprung usegholt. Dä Vorsprung hei si ner bis zum Schluss recht konstant chöne phaute u hei somit dr Satz mit 22:25 für sich entschiede.

Trotz dr erste Niederlag vor Saison luege mir ufenes cools u spannends Spiel zrug wo mir viel positives chöi drus use mitneh. Iz fröie mir üs no uf üses letste Spiel vor Vorrundi gege Stude nächst Samsti am 16.30 Uhr z Buchsi. Be there.

VBC Münchenbuchsee : VBC Burgdorf (21:25 / 25:22 / 7:25 / 22:25)