Who let the dogs out

Was machtme am liebste amene Donnschti abe? Genaaau, Match i üsem wunderschöne Bodenacher spile. Am Donnschti Abe hei mir üse Gägner us Langenthal erwartet.

Nach 2 oder doch 3 Ingwershots us üsne Shotglesli oder Tassli u em ihtrudle vo zahlriche Fans (für am Donnschti Abe, Danke!) isches de losgange.

Im 1. Satz isches am Ahfang rächt usgliche gsii, mir hei Pünkt gmacht aber Langethal het üs o nüt wöue schänke. Ab mitti Satz hei mer chli chönne dervozieh. Mir hei super Ahgriffe kha, d Soutien het funktioniert u ir Verteidigung hei mer o kuuli Bäu kha. Langethal het mau churz chli chönne ufhole aber dä Satz hei mir trozdäm 25:18 gwunne.

Witer geits im 2. Satz. Am Ahfang isches eigentlech no guet gloffe. Mit kuule Servicserie wo o nachem Timeout vom Gägner si witer gange hei mir chönne punkte. Gägä ändi isches nümm so üse Satz gsii, mir hei üs nümme so getrout uf dä Bau z schlaa u si nümme säubstbewusst ufem Fäud gstande. Aber nacheme Spilerwächsu u Timeouts hei mir dä Satz glich no für üs chönne entscheide mit 25:23.

So jz chunnt dr 3. u letzt Satz hei mir üs gseit. So het am ahfang aber ni usgsee… üsi Ahnahme si nümme so konstant gsii u wemerse mau hei kha hei mer am Netz e fähler gmacht. Doch schnäu hei mir üs wider gfasset u si iz Spiu zruggcho, o hie hei mer es paar Servicserie kha wo üs id Charte hei gspilt. So het me o viu vo üsere Bank dä folgend Satz khört „Who let the dogs out!“. Witer heimer wider säubstbewuster ahgriffe u verteidigt. Schlussändlech hei mir o dä Satz mit 25:19 gwunne.

Mir si stouz hei mir witeri 3 Pünkt uf üsem Konto. Jez gniesse mer ds Volleyballfreie Wuchenänd u am 25.11.23 geits witer gägä STV Oensingen.

Insidertipp: Es wird a däm Buchsisamschti e Racletteplousch mit Glüehwii gää😉

VBC Münchenbuchsee - VBC Langenthal (25:18, 25:23, 25:19)