Krönender 1. Buchsi-Samschti Abschluss

Am Samschti si mir i üses 1. Spiel vo dere Saison gstartet . Mitem super Ambiente vom 1. Buchsi-Samschti u emene Ingwershot wo üse Captain z Ängi gmacht het simer i erst Satz gstartet. Es het rächt usgliche ahgfange. So ab dr Heufti hei sech uf üsere Site geng wi meh Eigefähler iigschliche und so heimer de Satz mit 21:25 verlore. 

Dr 1. Satz hei mir ni eifach so uf üs wöue la hocke. So simer i 2. Satz gstartet. O hie isches es chopf a chopf rennä gsi mit em bessere Ändi für üs. 27:25 

Mir si rächt guet i dritt Satz gstartet. Mit guete Service heimer üsi Gegner chönne unger Druck setze. Üse Punktevorsprung vom Afang heimer bis am Schluss chönne phaute und dr dritt Satz isch mit 25:16 üse gsi.

Im vierte Satz heimer dr Start e chli verpennt u es hei sech o meh Servicefähler bi üs ihgschliche... so het Aeschi ihre Vorsprung bis am Schluss chönne phaute u het de Satz schlussendlech ou gwunne. 22:25

Im füfte satz heimer nomau aues gäh. Am Ahfang hets ni so klappet, üsi Ahnahme si nümme so stabiu gsii u im Ahgriff simer ni so konsequent gsii. Mit dr Ungerstützig vo üsne tolle Fans heimer dr Sack zuedah (Zitat Captain). 15:13

So hei mir wie letzt Jahr d Saison miteme 3:2 gstartet. Danke a die lutstarchi Ungerstüzig vo üsne Fans!

VBC Münchenbuchse vs. VBC Aeschi (21:25, 27:25, 25:16, 22:25, 15:13)