Mitemne Knorz zu 2 Pünkt

Hütt heimer am zwöite Buchsisamsti vor Saison di zwöite Ufstigerinne vo Muri Bern erwartet.

Üses Kader isch leider bitzli dezimiert. D Nik isch immer no irgendwo in Südkorea am umereisle, d Janine in Mexico am Aquacycling mache u ds Meli ufdr oder näbdr WC-Schüssle dehei.

Nichts desto trotz heimer wöue punkte u üsi Heimhalle verteidige. D Lisa vom Dame3 isch üs cho ungerstütze (mercii und super gmacht!). 15 Minute vor Spiubeginn hets de ono e spontane AC gäh, danke Noel.

Mir si unnötig närvös is Spiu gstartet, hei d Anahm unpräzis gspiut u so chame haut nid punkte. Es bitzi hetsech ds Spiu stabilisiert, aber füre Satzgwinn hets nid glängt (27:29).

Ir gliche Formation vom erste Satz simer i zwöit Satz, dr Löru het e Reset verlangt. Dasmau simer stabiu gsi, hei meh gredt, präzisi Bäu gspiut u so punktet. Mir hei dr Satz klar chönne hole u usgliche (25:16). Im Dritte simer ändlech uf normaler Leistigsfähigkeit gsi u mir hei mit super Service Druck gmacht. Dermit ischs ir Defence eifacher gsi u mir hei ender punktet aus d Froue vo Muri. Si hei zwar chli ufdräit drum ischs nid ganz so klar gsi (25:21).

Aus hättemer verlehrt wasmer gad gmacht hei, simer katastrophau i 4. Satz gstartet. 6:1 simer bim erste Timeout hinge gsi u d Trainerbank nümme so guet druffe, was üs dr Löru im Timeout dütlech het zeigt. Mir hei chli chönne ufdräie aber hei dr Rückstand nie ganz ufghout u gäg Ändi Satz isch sogar wieder gross gsi. So heimer dä Viert abgäh u üs ufs Tie Break gäg Muri vorbereite.

Plötzlech hetme gseh, dassmer eigentlech wei gwinne u guet chöi Volleybau spiele. Zum Sitewächsu heimer 8:3 gfüehrt. Nacheme Zwüschetöif het üs d Lya dr Match mit guete Service heibracht.

Super guet ischs nid gsi u definitiv nid eifach. Drum müessemer üs mit zwöi Pünkt zfride gäh.

VBC Münchenbuchse vs. Volley Muri Bern 3:2 (27:29, 25:16, 25:21, 19:25, 15:9)