5 Sätz miteme hammer Heimpublikum!

zum schluss vo däm heissä (aso wük heiss, i gloub t lüftig isch irgendwie nid gange, es het so gstunke ey!) buchsisamschtig isch no üses spyu gäge burgdorf agstange.

wüu di meischte vo üs scho vorher match hei gha, isch z ywermä nid so extrem gsy. nach de traditionelle ingwershots simer aber ready gsy für ds spyu

dr erscht satz isch änlech gsy, wi z spyu ir vorrundi gäge burgdorf. si hei üs mit guetne service und starche ahgriffe chly abegmacht. mir hei zersch no chönne mithaute aber am schluss när 19:25 dr erscht satz müesse wägsteckä.

im zwöite satz hets grad umgekehrt usgseh. mir hei ufdräit mit üsne service und hei guet gschaffet ir defense. so isch dr zwöit satz mit 25:19 a üs gang.

dr dritt satz isch rächt es chopf-a-chopf-renne gsy. beidi teams hei gueti sache zeigt und ds spyu het gfägt. highlights si zb t hammerschleg vo de mittine vo buchsi und aber o vo burgdorf gsy. mir si nöch dranne gsy, hei aber ändi satz nacheglah und so het burgdorf dr dritt satz 25:22 gwunnä.

dr viert satz isch e emotionali achterbahn gsy. wäg de starche service vo de gägnerinne hei mir ir anahm müeh gha und es isch viu gar nid zumne spyuufbou cho. aber mir hei üs no nid wöue gschlage gäh. mir hei e absoluti närveuftribendi ufholjagd ygleitet! ändi satz isches, wi Dinah gärn seit, es “angschthasevolleybau” gsy, wüus huere knapp isch wordä! burgdorf het matchbau gha, mir hei ne abgwehrt, mir hei satzbau gha, burgdorf het abgwehrt. es isch richtig geili stimmig gsy und mir hei (unger angerem o mitr ungerstützig vo üsem heimpublikum -looove <3) dr viert satz 28:26 gwunnä, yeah!

so dr füft satz… leider leider isch bi üs äue t luft chly dusse gsy wäg dem vorherige satz. mir hei üsi leischtig nümme chönne bringe, wi mers eigentlich hätte wöue u hei dä letschd satz 9:15 vrlorä

schade wars, aber ds spyu het üs mentau glych chly öppis gelehrt :)

VBC Münchenbuchsee vs. VBC Burgdorf (19:25 / 25:19 / 22:25 / 28:26 / 9:15)