Gad wyder 3:2 gwunne

Immer no euphorisch wäg üsem 3:2 Sieg vorgester gäge die Erstplatzierte isch hüt am Mittag ds Spiu gäge Oensige ahgseit gsy. Ir Vorrundi isch ds üse erscht Match gsy i dere Liga & hei mir gäg di momentane Zwöitplatzierte 3:2 gwunnä. Ds heisst mir si o hüt wyder hungrig uf gwinnä gsy!

Dr erscht Satz hei mir mit guete Defense & herte Ahgriffe rächt dütlech 25:17 gwunnä.

Im zwöite Satz ischs genau so wyter gangä, 25:19 für üs.

Vorem dritte Satz säge mer no so “iz weimr dä fluech bräche”, wüu mr ir Vorrundi gäge Oensige und am Fryti gägi Papiermühle beidi mau 2:0 vore si gsy u när glych no e 5sätzer hei müesse/dörfe spylä. Aber leider het ds nid so gäbig klappet, Oensige het ufdräit und mir hei o nümme üsi besti Leistig zeigt. So hei mr dä dritt Satz 17:25 vrlorä.

Dr viert Satz isch es uf und ab gsy. Oensige het a ihri Leistig vom vorherige Satz aknüpft u hei üs mit starche Service dürenang bracht. Trotzere Ufhoujagd gäge Ändi Satz hets nid glängt und Oensige gewinnt 25:21.

So, wemer scho 5 Sätz müesse spyle nach somne stränge Wuchenend (fasch aui hei Fryti + Samschdi Match gha) de weimr o gwinnä! Dr füft Satz isch vou Emotione und geile Bäu gsy. 14:13 für di angere, aber e Spilerin vo Oensige macht Servicefähler und mir hei so dr erschd Matchbau vo ihne “abgwehrt”. Zum chrönende Abschluss ä eeewigs länge Bauwächsu und am Schluss ä längi Finte vo üsere Captain bringt üs dr Satz- und somit Matchgwinn. 17:15

Richtig nice 2h Match gsy! Und mir hei zeigt dassmer o aus 7. iz übrigens 6.platzierti, di höchere Teams chöi schlah ;)

Ja i muess zuegäh, i finge ds scho grd chly geil hei mr die zwöi obere Teams gschlagä 🙂

VBC Münchenbuchsee - STV Oensingen (25:17, 25:19, 17:25, 21:25, 17:15)