Witeri 3 pünkt am letste Heimspiel vor Saison

Dä samsti isch es scho so wit gsi u ds letste Heimspiel vor Saison isch ahgstande. Mir hei dr VBG Welschenrohr dörfe begrüesse. Üs isch klar gsi ds si e Gegner si wo me ni darf ungerschetze.

D devise isch klar gsi, konzentriert is Spiel starte, ds isch üs ou glunge. Gd am Afang hei mir mit es paar Pünkt chöne i füehrig ga.. Ds Spiel isch ner recht usgliche gsi, dr service het hie e grossi rolle gspielt u es isch ab u zue zure Serviceschlacht worde. Dank em guete Start u ner doch no paar guete Aktione düre Satz düre hei mir dä mit 25:18 für üs chöne entscheide.

Im zwöite isch Welschenrohr besser gstartet u am Afang churz paar Pünkt i füehrig gange.. Mir hei aber dank guete Service u plazierte Ahgriffe dr Rückstand schnell chöne ufhole. Somit hei mir o dä Satz mit 25:20 für üs chöne entscheide.

Mit zwöi wechsle si mir ner i letst Satz gstartet. Dank nomau meh Druck im Service hei mir Welschenrohr vo afang ah «im Griff» gha. Si hei meh Problem im Spielufbou becho u dr Punkt nüm guet chöne schribe. Dür zwöi serviceserie isch de schnell 25:9 zu üsne gunste gstande.

Am samsti steit ds nechste Spiel gege Burgdorf ah – wie ou ir vorrundi ds Spitzespiel. Mir freue üs über jedi ungerstützig. Be there!

VBC Münchenbuchsee – VBG Welschenrohr (25:18 / 25:20 / 25:9)