Matchbericht gegen Vopap

Mer sind pünktlich die Halle gsi und hend eus locker und ohni Spannig afoh ufwärme. Es Ischloh hett uf beidne Siite recht stabil usgseh, mit mehrere Bäll, die fast oder gar ganz uf d Tribüni «gfätzt» worde sind. Als mer denn vorem erste Satz zemme cho sind, isch de Uftrag vo eusne Trainer klar gsi; zeiget dem Gegner, was mer güebt hend und was ehr chönd, wichtig sind e stabili Defense, e guete Service und Pünkt usem Soutiens mache.

Und so wie mer halt sind, hemmer eusne Trainer guet zueglost und abglieferet. Zwar simmer usser im 2. Satz immer hindedrii gsi aber durch Teameffort hemmers immer wieder gschafft uszgliiche und denn namal es Sideout z spiele – es beste dranne isch gsi, dass es immer um die 20 Pünkt passiert isch. Was das für eus heisst: mer hend eus selber bewiese, dass mer die «Crunchtime» ned euses «cool» verlüre und wie erfahreni Veterane eifach wiiter spiele und die Sätz hei tueh chönd.

Satz 3 hemmer e chliini Flaute gha, mer hend zwar ned schlechter gspielt abd d’Fehler hend sich uf eusere Siite summiert, was mer denn au im Satzresultat gmerkt hett. Aber egal, so macht mers halt, ein Flaute-Satz isch völlig legitim, wenn mer die andere drü solid und mehrheitlich dominant spielt.

Satz 1, 2 und denn 4 gönd klar a eus und mer muess segge, dass s ganze Team deför verantwortlich isch. Das Mal hemmer ned einzelni Spieler gha, die es Team zum Sieg treit hend, sondern jede einzelni. Sobalds eim ned guet gloffe isch, hett mer locker mit der Bank chönne uswächsle und die Spieler sind inecho und hend eifach abglieferet. Nennenswerti Bispiel sind de Wechsel vom Sedi mitem Domi im 4. Satz, de denn e Service-Run gha hett und jede Punkt für sich gmacht hett, de Nino füre Noah im 4. Satz, de nach 7 Wuche Abweseheit inecho isch und blockt hett, als ob er nie weg gsi wäri oder de Anthony füre Zanggi, de es Passeur Niveau fast namal s bitz meh aghobe hett, was eigentlich ned vorstellbar isch gsi.

Eusi Trainer sind begeisteret gsi, Vopap überrascht, d Zueschauer hend ihres Spektakel becho und d Spieler sind erschöpft aber glücklich id Garderobe go Dusche. Zwar hemmer kei Ambitione ufzstiege, aber mer bechöme irgendwie immer meh Pünkt und rücke immer nöcher zu Platz 2 und 1 uf… Chli vo hinde chützle, das hetts H2 vom VBCM doch scho immer guet chönne :-).