Perspektive vor Bank

Am hüttige Sunnti, heimr üs dahei im Bodenacher troffe, um dr letscht Match vor Hiirundi gege SV Dürrenroth z spile. Chaut isches nid nume dusse sondern dank de super Lüftige wo nur im Winter loufe ou bi üs ir Haue gsi (wird nid appreciated). Nid sehr untypisch heimr widrmau weg Spilermangu Verstärchig becho vor Anna, Lindsey und Lorena, merci euch drüne fürs usheufe!!  Usserdem simr hüt nur mit eim Coach ungerwegs gsi, wöu dr eint chrankheitsbedingt usgfaue isch.

Eis isch üs vo Afang ah klar gsi, de Match weimr und müessemer gwinne. Mit dem Mindset si o d Spilerinne wo actually chöi spile ga ihwerme.

Dr erst Satz isch am Afang nach Plan gloffe. D Anahme si guet gsi d Päss ou und dr Agriff isch cho. Ir Mitti vom Spiu hetts denne widr mau chly Down-Phasene gäh aber nicht weiter schlimm. Für di letschte Pünkt hei si denne widr chly meh müesse geh, wöu vom Gegner meh isch überecho und mir seubr dr Punkt hei müesse sueche. Dr Mood isch definitiv lightened worde, wos plötzlech bi aune chly zu Verwirrig isch cho wöu e Service mit ere Anahm gspiut isch worde? Eh ja me chas ja versueche. Naja ämu heimr de Satz mitemne Punktestand vo 25:17 für üs chönne entscheide.

Dr zwöit Satz isch eif vo Afang ah nid so ghoffet wi erwartet, obwou di gliche Spilerinne ufem Feud si gstange (ja so viu Uswau heimr haut nid), hett irgendöppis nid klappet. Obs am absolute Schinwerfer het gläge cha me  nid säge. Trotz meherne Time-Out Versüech vo üsem Coach und versuchte Afüühr-Aktione vo dr Bank, hei mirs nie gschafft so würk dr Vorsprung z näh. Immerwieder heimr Eigefehler ir Anhahm gmacht, so ds üsi Passeuse nid würk viu hett chönne mache und d Agrifferinne Gratis-bäu hei übere müesse spiele. Es paar Mau heimrs gschafft gha, voruus z gah, abr wöus schüsch mentally eif zu easy wär für aui verletzte und si üs anschiinend gern gseh liide, hei mir üs immerwieder dür Eigefehler lah ufhole. Schlussendlech heimr de Satz, nach viu Verzwiflig vo dusse, mit 26:24 für chönne gwinne.

Aus hätte mer e komplette Switch gswitched (vlt hets ja trotzdem a de absolut blendende Fenster gläge, demfau sorry a üsi Gegnerinne) isches plötzlech es kompletts angeres Game gsi. Ass nach Ass heimr chönne mache bis si bim Punktestand vo 1:6 schliesslech es Time-Out hei gno. Ds het üs abr ni würk abghaute und mir hei gad nomau eis gmacht. Nid churz druf isch de o scho z zwöite Time-Out gno worde, trotzdem heimr üs nid lah zrügghaute. Wi im erste Satz si d Anahme widr schön cho, d Päss si guet cho und d Agriffe si gfätzt cho. Wöu mir haut eif gärn Volley spile (obwou öppe so 1/5 vom Team nid sött) heimr haut so 2-3 Versüech brucht um dr Matchpunkt z mache. Irgendeinisch heimrs de ämu trotzdem gschafft und somit isch o dr dritt Satz mit 25:12 für üs gstumme gsi.

Mit dem Sieg, heimr ir Hiirundi auso 7/8 Matche gwunne und si 2. Ir Tabeue. Schlecht isches uf jede Fau schomau nid abr verbessere schadet ja o nid geu? Ämu heissts iz für üs ab id Winterpouse, see you next year!

VBC Münchenbuchsee vs. SV Dürrenroth 3:0 (25:17, 26:24, 25:12)