Chin up and go

Am windige Sunnti si mir in Uettlige gsi. Ds Spiu gäge diräkt Tabäuenachbar verspricht, spannend ds wärde.
Mir hei üs guet vorbereitet u hei de im erste Satz fulminant chönne starte. Mit guete Service u starker Blockarbeit hei d Uettligerinne viu Druck gha. Si heisech de aber gfange u dr Satz isch nomau spannend worde. Nach viu hin und här und ufregende Bauwächsle, heimer dr Satz glich no 27:29 chönne hole! Mir säge nume Bi Ba Buuh!

Im zwöite simer gad schnäu mit 6:0 i Füehrig gange. O da het aber Uettlige nid ufgäh sodasses Mitti Satz wieder isch usgliche gsi. D Bank isch mit dr voue Azauh a Time-Outs u de damit verbundene Lines immer meh oder weniger warm blibe (was i dere Haue no schwirig isch). Usserdäm hets vom Teamusflug vom Mittwuch mau nöie Schwung is Afüür-Programm gäh.
Chline Zwüscheschub: Mir si zäme ga ds Europapokal Spiu vo Schönenwerd gäg Athen ga luege, u di Grieche wüsse, wieme Blockpünkt gebührend cha fiire.
Zrügg zum Spiu, d Buchsimuur isch zumindest i Satz 1 und 2 gstange u das heimer genau so potänt uf griechischi Art gfiiret! „Siuuuu!!!“🥳
Entsprächend heimer üs dr entscheidend Vorsprung chönne hole u si 2:0 i Füehrig gange.

Satz 3 isch de vo Afang bis am Schluss äng gsi. Me het üs bitz agseh, dass di erste zwöi scho sehr intensiv si gsi, sodass nümm aus so sprützig u kräftig isch gange. Ou d Blockarbeit isch bitz weniger konsequänt gsi, so het üs Uettlige meh ir Defence verwütscht. Aber si hei derfür ir Anahm wieder bitz meh Müeh gha u so heimer am Schluss dr Druck nomau chönne ufefahre. Bim Stand vo 21:23 für Buchsi isch de bimne fragwürdige Bau gad Captain 1, 2 und 3 vo Uettlige zum Schiri gloffe. Wo de nurno ei Captain isch binim gsi, hets d Entscheidig für üs gäh, dass Uettlige vier Berüehrige het gha. Drü Bäu später isch dr 0:3-Sieg für üs im Trochene gsi!

Di starchi u konsequänti Leistig wird belohnt miteme Sprung gäg ufe ir Täbaue. Nächst Wuche steit genau di glichi Mission gäg Aarberg ah, wöu iz simer mit ihne punktglich.

Samsti, 11.11.23, 15:30 Uhr, Bodenacker
Let‘s go!
Plus ei(s) Tabäuerang!

VC Uettligen vs. VBC Münchenbuchsee 0:3 (27:29, 22:25, 22:25)