Es uf u ab ar Buchsiwiehnachte

Während die andere Teams bereits dr eint oder ander Glüehwy het chöne gniesse, isch für üs dr Startpfiff am 8ii losgange füre Match gäge Oensinge. Mir hei gwüsst das üs ä sterchere Gägner bevorsteht aus die letze paar Spiu.

Mit voller Motivation simer ih erst Satz gstartet. Mir hei gueti Ahgriffe gha und hei oh im Service chöne Druck mache. Oensinge het üs nüt gschänkt und mir hei üs jede Punkt erkämpft. Obwouh dr Satz sehr usgliche verlofe isch, hei mir dä Satz mit 25:22 gwunne.

Im zwöite Satz isches öbe glich gange wie im erste. Jedoch simir Oensinge immer ei oder zwöi Pünkt hingenache ghinkt. Leider heimer im Ahgriff wie oh im Service vermehrt eigefähler gmacht. Dür ds hei mir üs nümme trout uf d'Bäu z schlah. Gäge Ändi vom Satz heimer ä Satz Bau abgwehrt und hei nomau aues gä. Leider hets nid gläng und mir hei dr Satz mit 24:26 vrlore.

Im dritte Satz hei mir üs vorgno widr mit Säubstbewusstsi uf die Bäu z schlah und widr mit fröid z spiele. Ds het oh würkig zeigt und ih däm Satz hei mir üses Spiel chöne spiele. Mir hei Punkt für Punkt gmacht und hei Oensinge bi 15:11 ines Timeout zwunge. Ds het no nid so viu Würkig zeigt und mir hei üses Spiu chöne witerzieh. Oensinge isch bi 17:12 nach super Services vo üs erneut zumene Timout zwunge worde. Ds het de när oh dr gwünscht Effekt gha und Oensinge het widr chöne ufhole. Trotz auem hei mir üs nid us dr Rueh lah bringe und hei Oensinge nie ganz ah üs häre glah. Mir hei dä Satz mit 25:21 gwunne!

So wiemer hei ufghört heimer oh ih viert Satz wöue starte, ds heimer üs zmingst vor gno. Mir hei mega Müeh gah mit de Service vo Oensinge. So si si schnäu mit 0:7 i füehrig gange. Bi üs isch nüt meh gange. Mir hei Müeh gah mit de Annahme und ouh viu Eigefähler im ahgriff gmacht. Drzue si bi üs sehr viu Bäu ufgrund vo Kommunikationsproblem ah Bode gheit. Trotz auem isch üse Kampfgeist nid abhande cho, im Gägeteil. Üse Kampfgeist isch gäge Mitti vo Satz immer wie stercherworde. Leider hets de doch nid ganz glängt und mir hei dr Satz mit 20:25 vrlore.

Wasmer jedefaus nid hei vrlore im vierte Satz isch üse Kampfgeist. Ih füft Satz simer mit ganz viu motivation gstartet. Dank äre super Service Serie vor Mia, heimer üs e guete Vorsprung chöne erkämpfe. Bi üs het wieder aues Funktioniert (oh d Passfinte 😉). Mir hei extrem viu fröid ufem Fäud gha, was oh Dank em grosse Publikum isch gsi. Mir hei dä Satz mit 15:9 gwunne.  

Nach meh aus 2 Stund heimer dr Sack zue gmacht und hole witeri 2Pünkt uf üses konto.
Mercii ah aui vo üs Ahgfüüret hei! Es het gfägt!

VBC Münchenbuchsee - STV Oensinge (25:22, 24:26, 25:21, 20:25,15:9)