Cup Haubfinau ganz knapp verpasst

Schnäu nach üsem letzte Cupspiel isch klar gsii wär mir im 1/4 Finau träffä: Aeschi 3. Liga Pro. Mir kenne si scho vor Meisterschaft u hei gwüsst dases ni eifach wird, i dere Wuche träffe mer gd 2x uf sii, aso weder noni gnue heit dörfter üs gärn am Donnschti abe wider cho ungerstütze gägä Aeschi!

Mir hei no ungerstützig vor Lya u dr Milena vom D1 becho, danke tuuusig siter mitchoo! Het gfägt mit euch!

Mir si relativ guet i 1. Satz gstartet, d Ahnahme hei passt u mir hei gd sofort chönne Druck am Ahgriff u Service mache. Mitti Satz heimers churz einisch chli la schliife aber hei üs wider chönne sammle u dervozieh. Dank däm super Start hei mir de 1. Satz chönne für üs entscheide mit 21:25.

Was mer chöi hei mer jetzt gd gsee im 1. Satz, mit em gliche Wille u dr Energie hei mer i 2. Satz wöue starte. Düre ganz Satz hets immer so Ups u Downs gää wo üs leider dä Satz gchostet het. Aeschi het i ihres Spiel gfunde u mir hei leider chli gschwanket. Dä Satz hei mir mit 25:21 müesse abgä.

Dr Chopf ni la hänge u wyter geits! Leider isches gd wyter gange wie im 2. Satz, mir hei wider meh Eigefähler gmacht am Service u ahgriff u Aeschi het vo däm chönne profitiere... mir hei nomau probiert chli ufzhole aber si leider nümme ganz dracho. Dr 3. Satz geit o mit 25:22 a VBC Aeschi.

"De mache mers haut i 5 Sätz" gesagt, getan. Mit neuer Energie simer i dä 4. Satz gstartet. Mir hei ni wöuä das Aeschi jez eifach cha dr Sack zuemache u hei üs nomau gwehrt. D Uswächsuspilerinne hei starch ahgfüührt, üsi tröie Fans wo äxtra uf Aeschi si cho si plötzlech o gstande u hei lutstarch Ahgführet. Mit dere ganze Energie u natürlech weniger Eigefähler u o vilne Blocktouchs u Blocks hei mir dä Satz chönne gwinne mit 19:25.

Äs isch scho spät u mir starte i besagt Golden Set, dr 5. Satz. Mir hei vo ahfang ah chönne dervozieh u si zersch uf dene 8 Pünkt gsii. Nachem Sitewächsu hei mer churz chönne so wyterzieh aber när hei sech wider meh Eigefähler ihgschliche u Aeschi het ds guet usgnützt... es isch immer änger worde u d Coaches hei es TimeOut duell gmacht, leider het üs die letzti Energie gfählt u mir hei dr Matchpunkt ni chönne mache... so het Aeschi ds ganze dräiht u hei mot 17:15 gwunne.

Chli entüscht wüu mer würklech aues hei gä chöi mir zruggluege u stolz uf die ganzi Teamleistig si. Es isch e mega spannende Match gsii mit viu närveufribende Situatione, 2 gäube Charte (vo üsere Site u vo Aeschis Site) u miteme super Teamzämähaut.

Mir verabschide üs für 2 Täg u gsee üs am Donnschti wider z Aeschi für z Meisterschaftsspiel.

VBC Aeschi - VBC Münchembuchsee (21:25, 25:21, 25:22, 19:25, 17:15)