> Zurück

3:0 verlore, aber glych 2 Pünkt gwunne :-)

Herren 2. Liga 05.11.2019

Mir sy am Samstig id Haue cho, um d`Bilanz gäge Vopap ds verbessärä. Idä letschte 2 Saisons isch im Cup immer Vopap d Ändstation gsy. D`Vorzeiche hätte aber besser chönne sy. Dr Chrigu hetsech leider im letschte Training verletzt. Zuäsätzlech isch ds haube Team idä Ferie oder am bügle gsy. So simer nur ds 8 a Match u dr Ben, üsä Ussäagrifer, het Päss gspiut.  
Dr Start i Match isch guet gsy. Ds Zämespiu het ou so funktioniert. Dr erscht Satz isch ä ängi Ahglägeheit gsy, aber leider heimer dä verlore.
Dr Start i 2 Satz isch üs glunge. Mir hei super gspiut und Vopap zumnä Wächsu zwungä. Dä Wächsu wird leider dr Usgang vom Spiu starch beiflussä (Gugg mau iiis dr Titu ah :-)) Ahschliessend het dr Gägner ufträit u dr Satz no chönne gwinne. Itzä simer scho wieder 2:0 hinger dri gäge das Vopap. Oder glych nid??
Ersch nachem Satz isch uscho, dass dr iigwächslet Spieler nid ufäm Matchblatt isch gsy. De het dr Schirri entschiede, dass mir dä Satz bechöme. De isch usämä 0:2 äs 1:1 worde, phuu heimer wiedermau Glück gha:-) Dr 3 Satz isch de schnäu Gschicht gsy. Vopap isch mit ihrer Wuet im Buuch um lenginä bessär gsy und si hei dä Satz zu 15 gwunne.  
Drü Sätz verlore, aber ds Spiu geit glych wiiter? Da heimer äuä aui ä Premiere gha. Dr viert Satz heimer grockt. Da heimer dominant gspiut, im Service Druck gmacht und üsi Chancene gnützt. Dä Satz heimer zu 21 gwunne. Mir hei doch nid wöue 4 Sätz nachenang verlüre :-)  
Im füfte Satz heimer änang nüt gschänkt. Äs isch bis am Schluss spannend gsy und kes Team hetsech chönne absetzä. Mir hei dä Satz de sehr knapp gwunne u so schlussändlech ou die 2 Pünkt ghout.  
No äs grosses Dankäschön a üsi Coachs, merci Rahel u Corina.  

VBC Münchenbuchsee – Volley Papiermühle 3:2 (24:26, 25:06 (23:25), 15:25, 25:21, 15:13)