> Zurück

Siegesserie hält an

Herren 2. Liga 12.02.2019

 

Am Samschti hei mr mit Solothurn ä diräkte Gägner im Bodenacker empfange. Z Hispiu hei mr no 3:1 verlore. Uf dr angere Site hei mr aber di leschte 6 Spiu in Serie gwunne und si dementsprächend in Form. Ar Sitelinie hei mr mitem Dario ä motivierte Ur-Buchsianer dörfe steue. Merci für di Isatz.

Dr erscht Satz het de zimlech usgliche gstartet. Es het sech es Chopf a Chopf Renne entwicklet, wo mir aber immer 1-2 Pünk vore si gläge. Z Niveau isch nid wahnsinnig höch gsy, es het viu gueti Bauwächsu gä aber o Unkonzentriertheite uf beidne Site. Zu Satzändi hei mr wi so oft di Saison dr Vorsprung nid ganz chönne bhaute und bi 23:23 dr Usgliich müesse entgägenäh. Dank de letschte Siige hei mr aber z nötige Säubstvertroue gha und mit solide Sideouts schlussendlech dr Satz doch no 29:27 chönne gwinne.

I zwöit simer dank gueter Block-Defence super gstartet und hei ä Vorsprung vo 5 Pünkt chönne usespile. So ischs de o witer gange. Mir hei dr Gägner mit konsequänte Agriffe und viu Druck am Service uf ganzer Strecki chönne dominiere und dr Satz dütlech mit 25:14 gwunne.

Nach emne Wächsu uf Usse (Löru für Pädu) simer im dritte ähnlech wi im erschte Satz lang gliich uf gsy. De si de o d Emotione no chli meh iz Spiu cho. Agstichlet vom Gägner hei mr die aber wunderbar in Motivation und de o Pünkt chönne umwandle. Bi 17:17 hei mr dank ere Serviceserie vom igwächselte Ben ä Gang chönne zuelege. D Stimmig (o dank dä lutstarche Fans) und üses Spiu si so guet gsy wi no säute di Saison. Mit 25:19 hei mr dr Satz und somit o z Spiu gwunne.

Nach 7 Niederlage in Serie ir Vorrundi hei mr ize di letschte 7 Spiu chönne gwinne und ir Tabäue zum Mittufäud chönne ufschliesse.

 

VBC Münchenbuchsee - Volley Solothurn 3:0 (27:25, 25:14, 25:19)